A Operación Quilo pretende sensibilizar a cidadanía, en especial a xente moza, e conseguir recursos de primeira necesidade para as familias empobrecidas das nosas cidades. Xorde en Nadal porque é a época da “paga extra”, pois é un tempo no que se mercan a maioría dos xoguetes e roupa do ano e gástase moitísimo máis en alimentación.
Queremos que nesta época do ano en que a solidariedade e a atención aos outros está máis desenvolvida na sociedade poidamos aportar o noso gran de area solidario.
É unha campaña que se reinventa ano tras ano para adaptarse á realidade e atendendo as necesidades do momento, pero que o que realmente pretende é conseguir que chegue un momento no que non sexa necesaria, sinal de que non haxa persoas que vivan en situacións desfavorecidas. De aí que nos guste traballar o corazón, a cabeza e as mans. Corazón para descubrir as causas inxustas do mal reparto da riqueza entre nós (familia, pais, mundo), descubrir e animarnos a construír un mundo máis fraterno no que desaparezan as desigualdades de todo tipo. Cabeza, pois ten unha lóxica a Operación Quilo, non so interna co corazón, senón externa como chegar a máis xente, buscar a maneira de conseguir que os recursos se poidan repartir máis e mellor... E mans, pois no traballo, na suor e no esforzo unímonos máis coas persoas que nada teñen. Non son palabras bonitas, son horas da nosa vida; compartimos vida cos demais.
Obxectivos
- Sensibilizar a cidadanía das situacións de pobreza nas nosas cidades.
- Concienciar das desigualdades do noso mundo.
- Promover un modo de vida máis comprometido coas persoas empobrecidas.
- Facilitar ferramentas solidarias para que cada persoa achegue o que crea necesario e poida.
- Encher de boas novas o noso pequeno mundo, a nosa cidade.
- Colaborar con entidades de acción social que están todo o ano coas persoas empobrecidas.
- Ser a ”paga extra solidaria” para moitas familias da nosa cidade.
- Implicar a entidades, organismos, administracións cidadás…, para que acheguen recursos para as persoas máis empobrecidas.
- Invitar a mocidade e a rapazada a implicarse nunha solidariedade activa, dando a cara polas persoas empobrecidas.
Cando?
Nos últimos meses do ano civil poñemos o acento nesta campaña. Aínda que as Comisións de Solidariedade dos nosos centros xuvenís están funcionando todo o ano e reflexionan, fórmanse e deseñan novas propostas a partires da experiencia da última campaña desde outubro até decembro, o momento forte da campaña.
Onde?
Nas cidades galegas de A Coruña, Lugo, Ourense, Santiago e Vigo, a través dos nosos centros xuvenís Ateibo, Abeiro, Amencer, Don Bosco e Abertal, respectivamente.
Para quen?
Todo o recadado na Operación Quilo vai destinado aos nosos veciños e veciñas que viven en situación de precariedade. Distribúese a través de entidades de acción social que traballan con elas durante todo o ano, como Cáritas, para nós todo un referente. Sabemos que así todo o recadado chega, e chega ben e a tempo ás familias máis necesitadas dos barrios das nosas cidades.
Como?
As accións son moi variadas e creativas, dependendo de cada cidade. Indicamos as máis significativas:
- Formación de voluntarios/as
- Pegada de carteis por escaparates da nosa cidade
- Buzoneo de oitaviñas en edificios da nosa cidade
- Posta de carros solidarios nos supermercados das nosas cidades.
- Colocación de petos en establecementos con mostrador.
- Eventos deportivos pro OQ.
- Eventos musicais pro OQ
- Eventos culturais pro OQ.
- Lazos en perruquerías.
- Colocarse nas entradas de hipermercados e supermercados en días sinalados.
- Colocación de caixas para a recollida de alimentos, e xoguetes en entidades culturais, educativas , sociais e de mocidade nas nosas cidades.
- Xornadas de recollida de alimentos en Centros Comerciais.
- Relación con empresas do ramo da alimentación e xoguetería.
- Donativos de particulares e anónimos.
- Actividade “Peso x quilos”.
- Báscula viaxeira.
- Roldas e comunicados de prensa.
- Achegamento a casa de particulares que fan doazóns de alimentos, xoguetes e/ou roupa.
- Sensibilización polas aulas.
- Xestos colexiais.
- Obradoiro de Solidariedade.
- OQI: semana intensiva de clasificación de alimentos, xoguetes e roupa.
Facendo historia...
Operación Quilo de Amencer- Ourense (2019)
Recolléronse os seguintes "quilos":
21.685 quilos de alimentos;
6.540 quilos de xoguetes.
20.100 quilos de roupa.
Todo o diñeiro recollido (6.494,15 €) inverteuse en alimentación.
Desde a Operación Quilo de AMENCER colaborouse con 16 Cáritas Parroquiais e dende elas atendéronse a 1.237 familias (3.281 persoas).
Participaron na campaña:
394 voluntarios/as (mozos e mozas e adultos).
267 comercios onde se colocaron petos.
38 perruquerías.
66 puntos de recollida-caixas (79 caixas).
33 supermercados (34 carriños).
15 empresas do ramo da alimentación, xoguetes e menaxe.
20 eventos deportivos.
9 eventos culturais.
5 recollidas especiais de xoguetes.
Operación Quilo de Don Bosco- Santiago (2017)
Participaron na campaña de recollida:
- 9 colexios de Santiago, 1 de Touro e 1 de Boqueixón.
- 8 centros da rede de centros socioculturais do Concello de Santiago.
- 14 establecementos comercias da cidade de Santiago.
- O Futsal, que difundiu a campaña entre os seus socios e afeccionados e recolleu alimentos no partido do 15 de decembro no Fontes do Sar.
OPERACIÓN QUILO 2017 cun balance de 4.582 quilos de alimentos e de produtos de hixiene persoal recollidos. Estes produtos chegaron a 204 familias con poucos recursos (604 persoas) e foron distribuídos por varias entidades de acción social da cidade: Cáritas Parroquial de San Pedro e Fontiñas, Asociación Arela, Centro da Muller Vagalume e o Cottolengo.
Operación Quilo de Abertal – Vigo (2019)
- Persoas voluntarias: 95
- Alimentos recollidos: 7871 (preto de 3 toneladas)
- Familias atendidas:
- Fundación Cume: 10
- Cáritas: 51
- Establecementos que participaron: 17 (pequeno comercio) e 1 supermercado
Operación Quilo de Abeiro – Coruña (2019)
- Persoas voluntarias: 37
- Alimentos recollidos: uns 2.000 quilos
- Familias atendidas:
- Juan Soñador: 35
- Cáritas: 30
- Establecementos que participaron: 3 supermercados + 1 equipo de futsal